محمود المليجي.. شرير الشاشة المصرية
محمود المليجي.. عرف باسم شرير الشاشة المصرية لكثرة تقديم أدوار الشر في أعماله، ومع ذلك كان بارعًا في تقديم أدوار الخير والطبيب النفسي، وتمكن على مدى عقود طويلة من احتكار قلب المشاهد وتحقيق جماهيرية عريضة، برنامج «تسجيلات من زمن فات» الذى تقدمه مشيرة كامل، تحدث مع الفنان محمود المليجى عن شخصيات بالحى البلدى أثرت به وبنشأته.
بدأت «مشيرة كامل» بقول «مع حرامى الكاميرا» الذى يسرق قلوب المشاهدين الطيب الشرس الأمين، محمود المليجي، لماذا الحى البلدى مطبوع في ضمير محمود المليجى؟
ليجيب عليها، لأن من فات قديمه تاه وأنا والحمد لله لم أته في مسالك الحياة، ومن طفولتى في بنى حسين بالمغربلين هناك الصورة الفنية الكاملة تلاقى النحاسين وتلاقى بتوع الشنط وتلاقى جميع الحرف ودى يعملها ناس فنانين وبجانب كدة تلاقى الأخلاق العالية والناس اللى بتسأل على بعض.
عم فرج الصايغ وده كان يجيب الملاليم ويطليها بالذهب ويفرقها علينا واحنا عيال صغيرين علشان نفرح بيها وبدون مقابل، وفيه قدامه عم متولى اللبان ده كان فتوة من الفتوات وكان طويل بشكل مبالغ فيه ولما كان يتخانق كان يتخانق بالدكة البلدى ويضرب بيها، عشت في المغربلين طفولتى وبعد كدة انتقلت لحى السيدة زينب اللى كان سبب في حبى وعشقى وتعلقى بالفن من خلال مسارح الموالد اللى كانت تيجى باستمرار.
فلفل الفراش ده كان لما ييجى ينصب فرش لميتم كان ياخد أقل سعر من اللى ياخده من نفس الفرش لو كان فرح على أساس أنه مجاملة لأصحاب الميت.
ولما دخلت مجال التمثيل لقيتهم السند الحقيقى ومرة تأخرت في دفع أجرة البيت وصاحب البيت ما كانشى من أبناء الحى فرفع عليّ قضية وخد حكم علىّ بالحبس وما رضيتش أقول لوالدتى عشان ما تزعلش، وفى يوم جه الجرس بتاع تنفيذ الأحكام، فعم على عبده قاعد في دكانته وسأل الجرس ده في بيت مين قالوا له محمود المليجى فقال «جرس في بيت محمود المليجى واحنا قاعدين ما نبقاش رجالة السيدة زينب نبقى عيال، فجرى على البيت لمّ صيغة مراته وجرى على الدكان لم الإيراد، ولموا كل اللى عندهم عشان يدفعوا الفلوس اللى عليا.
